Biodata Linda

Sebut aja nama Linda, tentu mayuh bala ti rinduka lagu-lagu Iban udah ngelala sapa penyanyi ti ngempu nama nya. Leka lagu enggau rentak tiun chukup tebilang, baka Melan-Melan, Asai Ati Enggai Beserara, Tusah Nyadi Menantu, Pugai Belalai, enggau pemadu baru Japai Udai Jamah Udah, udah bemain-main dalam pikir. Sapa enda ngelala penyanyi bajik betubuh mit tu, ti ngembuan sada nyawa ke chukup ngasuh patung enggai ngetu engkebut, lalu punggung semampai deka begiut maya ningga rentak lagu ala dangdut ranchak ti disadaka Linda nengah churung sepika. Ari puluh ribu iku kitai ti rinduka nyawa iya belagu, kada datai sebagi entara kitai ti ngelala iya enggau semak amat. Ngelala ari ni penatai iya. Ngenang bakani iya berengkah belagu. Sapa orang ti nyempulang, ngiching, ngiring iya ngagai dunya glamour ku jaku orang ke diatu.

Anak numur empat aya Lawrence Mit enggau ibu Regina Rima Jawa, Linda tu endang anak buah sera beri Petara ngagai apai enggau indai iya. Pengada iya suba endang disampika mai penampak enggau pengeranchak ba dunya pemerindang kitai Iban. Kati enda pia, laban Linda rinduka pengawa belagu kenyau ari mit suba lalu semampai disukung penuh apai enggau indai iya. Enda lebu, laban apai enggau indai iya mega orang ti landik bermainka nyawa enggau leka main asal kitai Iban. Linda Simai Anak Lawrence Mit tu datai ari menua Memalui, pegai Batang Skrang di Sri Aman. Iya kala besekula ba SRK Tabut, SMB St. Luke, Sri Aman, lalu nitihka menyadi iya ke Miri, dia Linda mindah besekula ba SMK Lutong dalam taun 1995.

Linda keterubah enggau orang bepekit belagu maya iya agi belajar ba primary lima, mai lagu Lina Kidang. Ba pekit keterubah nya Linda bulih numur satu. Udah bekau nya Linda jarang amat ngelaungka pekit ti bisi dipasuk iya, nadai siti udah ngelebu. Nadai enda bulih numur. Dalam taun 1993, taun ti balat bendar nyungkakka nama Linda ba pengawa belagu. Dalam taun nya meh Linda bulih numur satu ba pekit Merdeka Rama di Sri Aman, lalu taun nya mega iya keterubah ngerikot lagu ngena nama album Pengidup Bujang Dara begulai enggau kompeni LUH Sibu. Maya tu suba Linda madahka diri nadai ati deka ngerikot lagu tauka ngaga album laban irauka diri empu agi biak bendar tambah mega nadai peneleba ngaga leka enggau tiun lagu kediri. Tang unggal DJ RTM Francis Linggi Nyaran enggau penyanyi David Till meri gerenti deka ngaga lagu ke iya ngujungka Linda setuju recording ba LUH. Naka ka diatu Linda udah ngerikot sembilan iti album (maya Pegari Vol. 3), ti nerima sambut ti chukup manah ari bala peninga ba genap bengkah menua kitai Sarawak ditu.

Ditanya kami pasal bisi tauka enda ati Linda rinduka dunya belakun dalam filem Iban, dia iya madahka diri, naka ka diatu ati apin tekuing terejun ngagai dunya siti nya. Linda madah, dua dunya nya jauh bida. Taja di Semenanjung din mayuh penyanyi Melayu nyadi pelakun, tang Linda apin besedia nitihka menasan nya. Deka ngemeranka belagu tu enggau terit dulu, tambah Linda. Ngenang pasal pengidup penyanyi ti dikesayauka peninga mayuh tu, iya endang indu dara tulin rumah panjai.

Ba senentang hobi, Linda tu sigi indu ti bagas gawa. Iya rindu nurun ke umai, lebih agi enti maya nugal enggau ngetau. Linda enda belalaika diri sigi ngembuan penaluk ke bangsa diri. “Ah!! Anang tak ngeyumbungka diri ngaga diri enda nemu jaku Iban tauka ngaga diri enda nemu utai di menua ulu.” Ku iya nambah. Linda mega madahka diri rindu ngintu ruang bilik, nanam bungai enggau betanam sayur nisi rumah.  Linda mega rinduka lumba enggau main dikena nyaga pengerai tubuh baka bermain bowling, lebuh rembus ke nengeri.

Linda pan ngembuan tinjau ti jauh. Ba Linda, pengawa belagu tu mega baka pengawa bukai. Ia tau nyadi sebengkah ari jalai dagang dikena ngulihka pengelantang pengidup. Anang deka ngira diri tebilang, dikelala orang mayuh aja. Tentukan pengawa kitai nya ulih ngenataika asil, laban ukai semina kitai nya lelak, tang jam mega terbasau. Enti pengikak enggau pengelelak nya nadai mulaika asil, manah anang ngereja, nadai tuju ku Linda. Enti pengawa belagu tu nadai ngenataika penguntung udah tentu bala tokey-tokey di Sibu enggai ngereja dagang tu. Berindik ari juluk enggau tinjau nya, Linda bisi ati deka muka production kediri empu jemah ila. Ati apin tentu puas, laban penyampau asil jual album selalu enda ditemu bala penyanyi empu. Lalu pia mega pengawa bala bayat ke ngaga kaset enggau VCD tiru balat ngerugi bala penyanyi kitai. Linda bisi endar pengarap ke perintah lebih agi pemesai kitai Iban ulih nyaup mutarka pengawa tu ngambika bala penyanyi kitai bisi agi jalai.

Ari jerita Linda nya, tau disimpul pandak, dunya pemerindang kitai Iban agi jauh amat tinggal dibelakang enti dibandingka enggau bangsa Melayu di Semenanjung. Tang taja pia, mayuh amat studio ia ke diempu bansa bukai ti ngerikot lagu-lagu Iban udah nyengkau rega datai ke berjuta ringgit. Ari nya badas amat runding bala penyanyi kitai ti numbuhka gerempung baka SPIS (Serakup Penyanyi Iban Sarawak) ngambika enda bangat direnyuk, dikempuk orang bukai. SPIS ku Linda, patut ngiga jalai ngambika semua penyanyi Iban berakup rat agi. Linda bepesan ngagi semua penyukung enggau peningga, beli meh kaset enggau VCD ti original , ukai semina enggi iya aja tang nyengkaum penyanyi Iban ke bukai.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


Follow

Get every new post delivered to your Inbox.

%d bloggers like this: